ພະນະທ່ານ ໂຄອິຊຶມິ ຊຶໂຕະມຶ ເອກອັກຄະລັດຖະທູດຍີ່ປຸ່ນປະຈຳ ສປປ ລາວ ໄດ້ເຂົ້າມາຢ້ຽມຢາມ ຂພສປຍ

ໃນວັນທີ 23 ມີນາ 2026, ພະນະທ່ານ ໂຄອິຊຶມິ ຊຶໂຕະມຶ ເອກອັກຄະລັດຖະທູດຍີ່ປຸ່ນປະຈຳ ສປປ ລາວ ພ້ອມດ້ວຍທີມງານ ຈາກສະຖານທູດຍີ່ປຸ່ນປະຈຳ ສປປ ລາວ ໄດ້ເຂົ້າມາຢ້ຽມຢາມເຂດເສດຖະກິດພິເສດ ປາກເຊ-ຍີ່ປຸ່ນ ເອັສເອັມອີ (ຂພສປຍ) ເພື່ອສັງເກດເບິ່ງສະພາບແວດລ້ອມໃນການລົງທຶນ ແລະ ດໍາເນີນທຸລະກິດຂອງບໍລິສັດຍີ່ປຸ່ນ ຢູ່ໃນ ຂພສປຍ.
ທ່ານ ເອກອັກຄະລັດຖະທູດ ໂຄອິຊຶມິ ໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ໂມຈິຊຶກິ ຜູ້ອຳນວຍການໃຫຍ່ຂອງ ຂພສປຍ ທີ່ຫ້ອງການບໍລິຫານຂອງ ຂພສປຍ ແລະ ທ່ານ ເອກອັກຄະລັດຖະທູດ ໂຄອິຊຶມິ ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບ ການພັດທະນາ ແລະ ການລົງທຶນຂອງ ຂພສປຍ ໃນປະຈຸບັນ ລວມທັງໂອກາດຄວາມເປັນໄປໄດ້ຂອງການສ້າງເປັນເຂດນິຄົມອຸດສາຫະກຳທີ່ບໍ່ມີການປ່ອຍມົນລະພິດ ໃນອະນາຄົດ.
ຫຼັງຈາກໄດ້ຮັບຟັງການລາຍງານຂອງ ຂພສປຍ ແລ້ວ, ທ່ານ ເອກອັກຄະລັດຖະທູດ ໂຄອິຊຶມິ ແລະ ທີມງານໄດ້ເຂົ້າໄປຢ້ຽມຊົມໂຮງງານທົດລອງຂອງບໍລິສັດ ລາວ ກຣີນ ໄຮໂດຣເຈນ ຈໍາກັດ ເຊິ່ງເປັນໂຮງງານຜະລິດກາເຟຂົ້ວດ້ວຍໄຮໂດຣເຈນ. ທ່ານເອກອັກຄະລັດຖະທູດ ໂຄອິຊຶມິ ໄດ້ໄປສັງເກດເບິ່ງຂະບວນການຜະລິດ ແລະ ຮຽນຮູ້ກ່ຽວກັບການມີສ່ວນຮ່ວມຂອງບໍລິສັດຕໍ່ການລິເລີ່ມໂຄງການດ້ານພະລັງງານສະອາດ ແລະ ການພັດທະນາອຸດສາຫະກຳທ້ອງຖິ່ນ. ຫຼັງຈາກນັ້ນ, ທ່ານ ເອກອັກຄະລັດຖະທູດ ໂຄອິຊຶມິ ກໍ່ໄດ້ເຂົ້າໄປຢ້ຽມຊົມໂຮງງານຂອງບໍລິສັດ ຊຶເກະ ລາວ ຈຳກັດ ແລະ ບໍລິສັດ ໄອເອສວີ ຈຳກັດຜູ້ດຽວ, ເຊິ່ງເປັນບໍລິສັດທີ່ຜະລິດສິນຄ້າກ່ຽວກັບຜະລິດຕະພັນຢາສູບ ແລະ ສິນຄ້າທີ່ກ່ຽວຂ້ອງກັບຢາສູບ ໃນ ຂພສປຍ.
ໃນລະຫວ່າງການຢ້ຽມຢາມຄັ້ງນີ້, ທ່ານ ເອກອັກຄະລັດຖະທູດ ໂຄອິຊຶມິ ໄດ້ຮັບຟັງການອະທິບາຍຢ່າງລະອຽດກ່ຽວກັບການດຳເນີນທຸລະກິດຂອງແຕ່ລະບໍລິສັດຍີ່ປຸ່ນໃນ ຂພສປຍ, ທ່າແຮງໃນອະນາຄົດຂອງ ຂພສປຍ ໃນຖານະທີ່ຈະຫັນເປັນເຂດນິຄົມອຸດສາຫະກຳທີ່ບໍ່ມີການປ່ອຍມົນລະພິດ ແລະ ກອບການຮ່ວມມືຂອງລັດຖະບານລາວ.
ໃນຕອນທ້າຍ, ທ່ານ ເອກອັກຄະລັດຖະທູດ ໂຄອິຊຶມິ ໄດ້ໃຫ້ຄຳໝັ້ນສັນຍາວ່າ ສະຖານທູດຍີ່ປຸ່ນປະຈຳ ສປປ ລາວ ຈະສືບຕໍ່ສະໜັບສະໜູນການດຳເນີນທຸລະກິດຂອງບັນດາບໍລິສັດຍີ່ປຸ່ນໃນ ຂພສປຍ ຕໍ່ໄປໃນອະນາຄົດ.